चितवन – चितवनमा पछिल्लो समयमा देखिएको बर्डफ्लूको कारण पोल्ट्री क्षेत्रमा ७० लाख रुपैयाँभन्दा बढीको नोक्सान भएको छ ।
जिल्लाको पूर्वी क्षेत्रमा बर्डफ्लू भएको प्रमाणित भएको थियो । खैरहनी नगरपालिका वडा नम्बर९ सूर्तनीमा बर्डफ्लू देखिएपछि त्यस क्षेत्रलाई संकटग्रस्त क्षेत्र घोषणा गरी पन्छीजन्य पदार्थ नष्ट गरिएको थियो ।
बर्डफ्लू देखिएको दुईवटा खोरमा गरी २ हजार ५०० कुखुरा मरेका थिए । संकटग्रस्त क्षेत्रमा ११ हजार ९५० लेयर्स कुखुरा, २३ वटा स्थानीय कुखुरा, १४४ वटा हास, चार वटा ब्रोइलर कुखुरा, ६०७ किलो दाना र १२ हजार ७२६ वटा अण्डा नष्ट गरिएको जिल्ला पशु सेवा कार्यालय चितवनका प्रमुख चेतनारायण खरेलले बताउनुभयो ।
बर्डफ्लू रोग नियन्त्रण आदेश २०६४ ले क्षतिको अधिकतम ७५ प्रतिशतसम्म राहत दिने व्यवस्था गरेको जानकारी दिँदै खरेलले भर्खर अण्डा दिन लागेका कुखुरालाई प्रति कुखुरा पाँच सय रुपैयाँ र अण्डा दिएर सक्ने बेला भएकालाई प्रति कुखुरा तीन सय रुपैयाँ लागत मूल्य सिफारिस गरिएको जानकारी दिनुभयो ।
सरदर कुखुराको मूल्य ४७५ रुपैया प्रतिगोटा मूल्य पर्ने गरेको जानकारी दिदै नेपाल अण्डा उत्पादक संघका केन्द्रीय अध्यक्ष त्रिलोचन कँडेलले अण्डा दिन सुरु गरेका लेयर्स कुखुराको लागत मूल्य ६०० रुपैयाँ पर्दछ भने अण्डा दिएर सकिन लागेका कुखुराको लागत मूल्य ३५० रुपैयाँ पर्ने बताउनुभयो । उहाँले ११ हजार नौ सय ५० लेयर्स कुखुरा मारिएका कारण लागत मूल्य ५६ लाख ७६ हजार २५० रुपैयाँ परेको जानकारी दिनुभयो ।
त्यसैगरी नष्ट गरिएका स्थानीय जातका कुखुराको सरदर २३ हजार रुपैयाँ, ब्रोइलर कुखुराको एक हजार ६०० रुपैयाँ, दानाको २७ हजार ३१५ रुपैयाँ, अण्डाको एक लाख ५२ हजार ७१२ रुपैयाँ नष्ट भएको जानकारी दिदै कंडेलले ७० लाख ६८ हजार ३७७ रुपैयाँभन्दा बढीको लागत मूल्य नोक्सान भएको बताउनुभयो ।
संक्रमित क्षेत्रमा ४२ दिनसम्म पन्छी पाल्न रोक लगाइएको जानकारी दिँदै पशु सेवा कार्यालयका प्रमुख खरेलले बर्डफ्लू अहिले नियन्त्रणमा रहेकोले जिल्लामा उत्पादन भएका पन्छीजन्य उत्पादन अन्य जिल्लामा पठाउन रोक नलगाइएको जानकारी दिनुभयो ।
