नेपाल राष्ट्र बैङ्कले मूल्यवृद्धि भएको प्रतिवेदन सार्वजनिक गरेको छ । गत आर्थिक वर्ष (२०७५/०७६) को मुद्रास्फीति साढे ४ प्रतिशत पुगेको छ । जेठ महिनामा उपभोक्ता मुद्रास्फीति ६.२ प्रतिशत पुगेको छ भने खाद्य र पेय पदार्थको महङ्गी पनि ह्वात्तै बढेको छ ।
जेठ महिनामा खाद्य तथा पेय पदार्थको मुद्रास्फीति ६.७ प्रतिशत छ जसमा माछा मासुको ७.६ प्रतिशतले मूल्य बृद्धि भएको छ भने तरकारीको १४.६ प्रतिशतले मूल्यवृद्धि भएको छ र खाद्यान्नको ५.६ प्रतिशतले मूल्यवृद्धि भएको छ ।
यता गैरखाद्यतर्फ औसतमा ५.७ प्रतिशतको महङ्गी छ । जसमा घरायसी सेवा तथा उपयोगिता सात प्रतिशतले बढेको छ भने लुगा तथा जुत्तामा पनि सात प्रतिशतकै महङ्गी वृद्धि छ । यातायातमा ४.७ प्रतिशतले बृद्धि छ भने फर्निसिङ तथा घरायसी उपकरणमा ५.७ प्रतिशतको मूल्यवृद्धि छ ।
काठमाडौँ सबैभन्दा महङ्गो
क्षेत्रगत मूल्यवृद्धिलाई आधार मान्दा काठमाडौँ उपत्यका सबैभन्दा बढी महङ्गीमा देखिएको छ । काठमाडौँ उपत्यकामा अहिले ७.१ प्रतिशतको महङ्गी वृद्धि छ । यस्तै तराईमा ५.८ प्रतिशत, पहाडमा ५.७ प्रतिशत र हिमालमा ६.५ प्रतिशत छ । यता भारतको वार्षिक उपभोक्ता महङ्गी ३.१८ हुँदा नेपालमा भने ६.२० प्रतिशत रहेको छ ।
